2021-mi kvartalit pingajuanni 2020-mut kvartalit pingajuannut naleqqiullugu saarulliit akii qaffariarput, qalerallit kinguppaallu akii tamaaginnarlutik

Kalaallit Nunaanni Naatsorsueqqissaartarfiup aalisakkat akiinut naleqqersuutit 2021-mi kvartalit pingajuannut tunngasut saqqummersippai. Aalisakkat tassaapput kinguppaat, qalerallit saarulliillu tunisassiat, 2010-mut oqimaalutarneqartut.

 

Agguaqatigiissillugu kiilumut akinik naleqqersuutinik naatsorsuinermi nunatta avammut niuernerani akit annertunerusumik atorneqarput, ilaatigut tunisassiortut anginerit akigititaannik tapertaqartarlutik. Tassa akinik naleqqersuutit Kalaallit Nunaanniit annissinermi akigitinneqartoq atorneqarluni.

 

Aalisakkat naleqqersuinermi taaneqartut oqimaassusiisa katinneri 2010-mi oqimaalutaaneq malillugu oqimaalutarneqarput. Taamaasilluni naleqqersuummut oqimaalutaq aaliangersimasoq Laspeyres-imik taaneqartartoq atorneqarluni.

 

Aalisakkat akiinut naleqqersuut (2010=100)

Najoqqutaq: Naatsorsueqqissartarfik - kisitsisaataasivimmik kisitsisit takukkit https://bank.stat.gl/fin009

 

Aalisakkat akii agguaqatigiissillugu 2020-mi kvartalit pingajuanniit 2021-mi kvartalit pingajuannut ima nikeriarsimapput:

 

-   Kinguppaat akii 2 procentip missaanik appariarput

-   Qalerallit akii 1 procentimik qaffariarput

-   Saarulliit akii 8 procentip missaanik qaffariarput.

 

Kalaallit Nunaanni Naatsorsueqqissaartarfiup nittartagaani https://bank.stat.gl/FIN009–mi aalisakkat akiinut naleqqersuutit ineriartorneri takuneqarsinnaapput.